Page 7 - Good News December 2007 paper

GOD MET ONS

"'…en hulle sal Hom Immanuel noem.' Die naam beteken God by ons"
(Matt. 1:23 NV).
Kersfees herinner ons daaraan dat God by ons is om ons gebrekkige
liefde te suiwer. Kersfees leer ons die waarheid van selfopofferende
liefde. Christus het na Sy eiendom gekom en Sy eie mense wou Hom
nie aanvaar nie. Desnieteenstaande het Hy aan almal wat Hom aanvaar
het die reg gegee om kinders van God te word.
Daar was vir Hom geen plek in die herberg nie. Nogtans waarborg Hy
'n plek in die huis van Sy Vader vir elkeen wat Hom liefhet en volg.
Hy was verag en deur die mense verlaat. Tog nooi Hy almal wat
vermoeid en belas is om by Hom rus te kom vind. Hy het die vermoë
gehad om van die kruis af te kom en almal uit te delg wat Hom bespot
het. Maar Hy sterf aan die kruis ter wille van my en jou sonde. Die
haatdraende wêreld gun Hom nie Sy lewe nie, maar Hy belowe met
hemelse liefde en genade die ewige lewe aan almal wat in Hom glo. Dit
is die taal van Immanuel, God by ons.
Daar is soveel liefdeloosheid en haat in die wêreld vandag. Dit
vertroebel die verhouding tussen mens en God, en mens en mens.
Maar Kersfees kom sê telkens vir ons dat die liefde sal seëvier. Omdat
God liefde is, het Hy Sy Seun gestuur. As God ons só liefhet, moet ons
ook mekaar liefhê. Kom ons bely opnuut ons liefde hierdie Kersfees:
aan God, aan ons ouers, aan ons lewensmaat en aan ons medemens.
Dán word dit waarlik 'n Christusfees.
Dankie, God van liefde, dat U toegelaat het dat U liefde in Jesus
Christus gestalte vind. Gee aan ons meer liefde deur die werk van die
Heilige Gees.
Ons liefde vir God word getoets deur die vraag of ons Hóm of Sy
gawes soek - Ralph W Sockman.
[Uit: Elke Môre Nuut, Solly Ozrovech, CUM, 1999].